በዕድገትና ትራንስፎርሜሽን ዕቅዱ የግብርናን ልማት ፈጣንና ቀጣይነት ለማረጋገጥ ወደ ኢንዱሰትሪ መር ለመሸጋገር የሚያስችል መሠረት ለመጣል ከተነደፉ አቅጣጫዎች አንዱ የግል ባለሀብቱ በግብርና ልማት የሚጫወተውን ሚና ማሳደግ ነው፡፡ ይህን ተግባራዊ ለማድረግ ፌዴራል መንግስት ስፋፊ መሬቶችን ከክልሎች በውክልና ተረክቦ እያስተዳደረ ይገኛል፡፡ በመሆኑም መሬት በመለየት፣ በማዘጋጀት በማስተዋወቅና ግለጽነት ያለውን አሰራር ተከትሎ በማስተላለፍ ልማቱን ለማፋጠን በግብርና ሚኒስቴር አማካኝነት ሰፊ ጥረት እየተደረገ ይገኛል፡፡ መሬቱ የሚተዳደርበት አግባብ ግልጽነት የተላበሰ እንደሆነና ህዝቡ ስለሂደቱ ግልጽና በቂ መረጃ እንዲያገኝ ለማድረግ የእያንዳንዱን ባለሀብት ውል በሚያሳይ መልኩ እስካሁን የተገቡ የመሬት ውሎች ከዚህ ጋር ተያይዘው ቀርበዋል፡፡ ወደፊት የሚተላለፉ መሬቶች ውልም በተመሳሳይ በተከታታይ የሚለቀቅ ይሆናል፡፡

በዚህ መረጃ ከተካተቱ የመሬት ማስተላለፍ ውሎች ውስጥ ለመረጃ ተጠቃሚው የበለጠ ግልጽ ሊሆኑ ይገባሉ የተባሉ ሁለት ውሎች ላይ መሬቱ የተገባበት ደረጃና ይዘት ለየት ስለሚል ተጨማሪ ማብራሪያ መስጠት አስፈልጓል፡፡ ሁለት የመሬት ማስተላለፍ ውሎች ማለትም የሳውዲስታር ካምፖኒና የካራቱሪ ፒ.ኤል.ሲ ቀደም ሲል ውሎቹ ከጋምቤላ ክልል ከአቦቦና ኢታንግ ወረዳዎች ጋር በመስከረም 19 ቀን 2001 ዓ.ም. እና በሰኔ 27 እና ሐምሌ 28 ቀን 2001ዓ.ም እንደ ቅደም ተከተላቸው የተፈረሙና በተገባው ውል መሠረት ሥራ የተጀመረባቸው ስለነበሩ መሬቱ ከነውሎቹ ለፌዴራል ሲተላለፉ የተገባው ውል ተጠብቆ መሆን ስለነበረበት ይኸው ተጠብቆ በፌዴራል በኩል መሬቱን ለማስተዳደር ሲባል ውሉ የቀድሞ ይዘቱን ጠብቆ እንዲፈፀም ተደርጓል፡፡ ቀሪዎቹ በፌዴራል በኩል የተላለፉና አዲስ የተዘጋጀውን የአሰራር ስርዓት ተከትለው የተፈፀሙ መሆናቸውን እንገልፃለን፡፡